Գնդլիկ բոքոնիկը Լինում են, չեն լինում` մի տատիկ ու պապիկ: Մի օր պապիկը` նստած պատուհանի մոտ` քաղց է զգում և ասում է տատիկին: -Մի բոքոն թխիր: -Ալյուր չունենք, -պատասխանում է տատիկը: -Գնա ամբարում փնտրիր, տաշտակից քերիր, -համոզում է պապիկը: Տատիկը գնում է ամբար, նայում է այս կողմ, նայում է այն կողմ, վեջը տաշտակի տակից մի փոքրիկ ալյուր է գտնում քերում: Վերցնում է ալյուրը, խմոր է հունցում, վառարանը վառում ու մի գնդլիկ բոքոնիկ թխում: Վառարանից հանելուց հետո բոքոնիկը դնում է պատուհանի գոգին, որպեսզի սառչի, իսկ ինքը վերադառնում է սենյակը հավաքելու: Գնդլիկ
բոքոնիկը պառկում է պատուհանի գոգին, ձանձրանում է և ցատկում
ներքև:Ընկնում է խոտերի վրա, այնտեղից էլ` ճանապարհի վրա ու երգելով առաջ է
շարժվում. Տաշտակից են ինձ քերել, Վառարանում են թխել, Պապիկից եմ ես փախել, Տատիկից եմ ես փախել: Գնում է, գնում, հանդիպում է նապաստակին: -Ա~յ դու գնդլիկ բոքոնիկ, հիմա ես քեզ կուտեմ, -ասում է նապաստակը: -Տաշտակից են ինձ քերել, Վառարանում են թխել, Պապիկից եմ ես փախել, Տատիկից եմ ես փախել: Քեզանից էլ, նապաստա'կ, կփաղչեմ... Եվ գլորվում փախչում է: Գնում է, հանդիպում է գայլին: -Ա~յ դու գնդլիկ բոքոնիիկ, հիմա ես քեզ կուտեմ, -ասում է գայլը: Որպես պատասխան` բոքոնիկը երգում է. Տաշտակից են ինձ քերել, Վառարանում են թխել, Պապիկից եմ ես փախել, -Տատիկից եմ ես փախել: Նապաստակից եմ փախել: Քեզանից էլ, գա'յլ, կփաղչեմ... Եվ գլորվում փախչում է: Գնում է, գնում, հանդիպում է արջին: -Ա~յ դու գնդլիկ բոքոնիկ, հիմա ես քեզ կուտեմ, ասում է արջը: Որպես պատասխան` բոքոնիկը երգում է. -Տաշտակից են ինձ քերել, Վառարանում են թխել, Պապիկից եմ ես փախել, Տատիկից եմ ես փախել: Նապաստակից եմ փախել: Նույնիսկ գայլից եմ փախել: Քեզանից էլ, ա'րջ, կփաղչեմ... Եվ գլորվում փախչում է:
Գնում է, հանդիպում է աղվեսին: -Ա~յ դու գնդլիկ բոքոնիկ, հիմա ես քեզ կուտեմ, ասում է աղվեսը: որպես պատասխան` բոքոնիկը երգում է. -Տաշտակից են ինձ քերել, Վառարանում են թխել, Պապիկից եմ ես փախել, Տատիկից եմ ես փախել: Նապաստակից եմ փախել: Գայլից, արջից եմ փախել: Քեզանից էլ, աղվե'ս, կփաղչեմ... -Ա~խ,ի~նչ լավ ես երգում, -ասում է աղվեսը, -ափսոս, լսողությունս լրիվ կորցրել եմ: Գնդլիկ բոքոնի'կ, խնդրում եմ, բարձրացիր դնչիս ու նորից երգիր:Այնպե~ս եմ ուզում լսել քո քաղցրիկ երգը: Բոքոնիկն ուրախանում է, ցատկում է աղվեսի դնչին ու բերանը բացում, որպեսզի երգի: Բայց չի հասցնում բոքոնիկը երկու տող երգել, երբ աղվեսը դնչով վեր է նետում նրան, բացում է բերանն ու կուլ տալիս: Արթուր Մանուկյան
